27 تعليقات

1.

alzaher كتب/ت

ها ها ها ها
يخرب عقلك يا أسد
عاملة زي مشهد في فيلم “أنا مش معاهم” بس إنت أظرف بصراحة:)
الحمد لله أنا بحلق بإستمرار يعني مش محتاج الكارت:)

alzaher — May 16, 2007 @ 9:00 pm
| Edit This
2.

reformer1976 كتب/ت

موضوع كارت متابعة الحمل دا مسخرة جامدة أوي... بس هو حضرتك جبته منين ده؟؟ أنا كان عندي منه كتير في الوحدة الصحية زمان... فكرتني يا واد أسد لما جوم قبضوا عليا يوم مظاهرة مجلس الشعب ويومها الظابط شاور عليا وقال هاتوا لي أبو دقن ده... ونقبهم طلع على شونة لما اكتشفوا إن الشيخ ابو دقن طلع مسيحي

هههههههه

reformer1976 — May 16, 2007 @ 9:53 pm
| Edit This
3.

نورا يونس كتب/ت

تدوينة عظيمة يا أسد.. كوميديا سوداء درجة أولي مكيف.. بعد اذنك، ترجمتها هنا

http://norayounis.com/2007/05/16/245
بجد، الله يجازي شيطانك

نورا يونس — May 16, 2007 @ 11:17 pm
| Edit This
4.

Medo Magdy كتب/ت

بجد جامدة موووت فكرة كارت المتابعة ده
ربنا معاك يا أسد

Medo Magdy — May 17, 2007 @ 12:04 am
| Edit This
5.

العميد ميت كتب/ت

أنا عايز كارت أنا روخر ، لأحسن أتمسك في أي كيمن
إبعت لي واحد علي العزبه بتاعت عمو جمال بقي
عشان أنا ماعنتيش في أملاك بابا مبارك ، أنا في عزبه بابا جمال دلوقتي

العميد ميت — May 17, 2007 @ 2:00 am
| Edit This
6.

محمود الششتاوي كتب/ت

الاخ العزيز أسد
تدوينة أكثر من رائعة واسمحلي اني انقلها داخل منتدى كفاية

محمود الششتاوي — May 17, 2007 @ 5:13 am
| Edit This
7.

Anonymous كتب/ت

طب احمد ربنا انها جات لحد كده ، الكمين ده على حد علمي كمين بانجو ، الطبيعي انهم يجيبو كلب و يقعد يشمشم فيك ، و اه لو الكلب عندو مزاج للهزار و الاشتغال ، تلاقيه هو هو على واحد غلبان و شايل كيس بلاستيك فيه كمون ، و عينك ما تشوف الا النور ، تلاقي الباشا و التاشا جتتهم اتلبشت
عادة فيه جزء من المضبوطات بيتصبن ، لزوم المزاج الشخصي و الرشاوي و تظبيط الأمور

Anonymous — May 17, 2007 @ 7:15 am
| Edit This
8.

asad كتب/ت

أهلاً أهلا يا شباب

نورتوا المطرح بس لمؤاخذة محدش يعتب هنا من غير كارت المتابعة بتاعه مش ناقصين مشاكل مع الجماعة ربنا يجعل كلامنا خفيف عليهم

حتى اللي بيحلق دقنه يا عم الزاهر لازم يشيل الكارت اللي يثبت الكلام ده ؛ هو الباشا فاضي يقعد يفلي كل واحد فينا

القانون دلوقتي بعد التعديلات الدستورية يمنع حيازة دقن في مكان عام بدون ترخيص و النائب د.مصطفى الفقي سيتقدم بمشروع قانون يقضي بأن يصبح الحلاقون من رجال السلطة العامة و مأموري الضبط القضائي حتى يتسنى لهم إعانة رجال الداخلية في الكشوفات الدورية على دقون المواطنين , أو إلغاء الكرت إذا حلق المواطن دقنه حلقة بائنة عند حلاق من رجال السلطة العامة .

———

الكارت سرقته من عيادة أمي طبعا يا دكتور جرجس أصلها زميلة

وبعدين الراجل اللي قالهم هاتوا الواد أبو دقن ما غلطش ما إنت مسيحي متأسلم , الإخوان هيجيبوا مين غيرك يوم ما يحبوا يقولوا إنهم بتوع وحدة وطنية وبتاع ؟!
——-

استمتعت جدا بقراءة ترجمتك يا نورا :) أيوة كدة خلي الواحد يوصل للعـــــــــالمية !! ويبقى مدون نوبل زي أديب نوبل كدة !!

ههههههههههه
———
عم المجهول ذو الخبرة الأمنية اللي بيقول الكمين ده كمين بانجو مش المفروض كمين البانجو ينزلوا فيه العيال المحششة واللي كل واحد فيهم شايل كام بشلة في وشه ؟ بياخدوا الشيوخ ليه بقى ؟ زارعين بانجو في دقونهم ؟ ها ؟

asad — May 17, 2007 @ 7:45 am
| Edit This
9.

خصيصا من عزبة الحاج كتب/ت

الأهرام
كتب أحمد موسى

فى تطور مثير لقضية تبديد الدقون تقدمت مجموعة من نواب الحزب الوطنى يتقدمهم اللوا بدر القاضى بمشروع تشريع قانونى عاجل لمجلس الشعب من أجل الحفاظ على ثروتنا القومية من اللحى بعد تزايد معدلات إهدار شعيرات الدقون فى الآونة الأخيرة، وقد تناول مشروع القانون عقوبات مغلظة على القائمين بتبديد اللحى تشمل هتك العرض الظاهرى عند تبديد ما يتجاوز خمسة شعرات، وإدخال عصا شمسية فى دبر مقترف الجريمة حال ثبوت تبديده لأكثر من ثمانية شعرات، واقتراف الفحشاء معه عند تجاوزه الشعيرات العشرة. كما سيترافق مع هذه العقوبات عقوبات إضافية تتراوح بين التغريم فيما لا يقل عن خمسون ألف جنيه والحبس ما لا يقل عن ثلاثة سنوات لكل من قام بتبديد شعيرات دقنه. وقد صرح مصدر امنى رفيع المستوى أن الوزراة قد أدرجت فى ميزانية العام القادم مبلغ مليارى جنيه مصرى لإنشاء قاعدة بيانات ضخمة تدرج فيها كافة البيانات الخاصة بذوى الذقون وعدد ما لديهم من شعيرات وطولها ونوعيتها، دهنية ام جافة، ولونها وما إلى ذلك من بيانات مفيدة، وتسعى الوزراة أيضا لتأسيس بنك للحى توضع فيه شعيرات ذقن من يقضون نحبهم من حائزى اللحى سواء بطريقة ربانية أو بفعل ما يتلقونه من جزاء، وأضاف المصدر ذاته أن ثمة مفاوضات تجرى مع جامعة أمريكية كبرى بهذا الشأن وهى جامعة قامت بنقلات علمية كبرى فى مجال حماية ورعاية اللحى، ومن بين العمليات المثيرة التى قامت بها إبدال وجه أحد المشبوهين ممن لا يؤتنمون على لحاهم بوجه شخص ميت مع الاحتفاظ بوجهه على مانيكان وهو معروض حاليا فى قاعة خاصة بمتحف بوسطن للتراث الانسانى.
والجدير بالذكر أن اليونسكو بالتعاون مع الحكومات العربية قد دشنت مشروعا إقليميا للحفاظ على اللحى ومتابعة أصحابها، وذلك عشية إعلان جمعيتها العامة اعتبار اللحى جزء من التراث الانسانى العالمى والزمت الدول التى لديها افراد يحوزون لحى بمتابعتهم بصورة دقيقة.

وقد أصدر محافظى القاهرة والجيزة قرارات فورية بتجريم حلاقة الذقون فى محال الحلاقة على أن تحلق بمعرفة أفراد متخصصين من مباحث أمن الدلوة، وقد تم تخريج دفعة استثنائية من معهد أمناء الشرطة ومعهد مندوبى الشرطة من المدربين تدريبا علايا على عمليات رعاية الدقون ومتابعتها وقد تم منشرهم فى مختلف الاقسام بالمحافظتين وتسعى عدد من المحافظات لتعميم التجربة الرائدة لديها.

وفى تصريح خاص لوكالة أنباء الشرق الأقصى أفاد السيد عمرو موسى أمين عام جامعة الدول العربية بأن موقف الجامعة وواضح وصريح وأشاد بالجهود التى تبذلها قوات الامن بمختلف الدول العربية ملاحقة مبددى الدقون، مشيرا إلى المؤتمر الاستثنائى المزمع عقده الشهر الماضى فى تونس لتداول أبعاد الموقف والخروج بموقف عربى موحد فى هذا الصدد،

وقد عرض برنامج الثالثة صباحا الذى يبث على فضائية الاثنين لقطات مأخوذه بكاميرا موبيل لأحد الأشقياء وهو ينزع ذقنه قبل كمين عبود، وقد أشارت مصادر نافذه إلى أن هذا الشقى قد لقى حتفه على يد قوات الأمن التى شكلت حملة ضخمة لمطاردته فى جبال الفيوم.

وتهيب وزراة الداخلية بحائزى الاذقون الالتزام باجراءات المتابعة التى فرضتها الوزارة على كل حائزى اللحى مع توضيح مهم هو أن تعبير اللحى يشمل أى شعر نابت فى منطقة الذقن سواء أكان ذقن سنيه أو سكسوكه خليجى أو تنتوفة شعر أسفل الشفة، وأفاد المصدر أنه بعد مناقشات مستفيضة قد تم إخراج السوالف من اعتبارها جزء من اللحية على ألا يشمل ذلك السوالف الطويلة ،

خصيصا من عزبة الحاج — May 17, 2007 @ 12:58 pm
| Edit This
10.

وليد كتب/ت

أمن الدولة يتابع أى شئ فى هذا البتاع المسمى وطن
لو عندك دار نشر وكنت محسوب على أى فكر أسلامى
يبقى المفروض لما تعمل بيبيى أه الإخراج يعنى لازم تاخده وتروح توريه للباشا الظابط
يطلع عليه قبل ما توزعه

وإذا كنت شغال فى الكاسيت يبقى لازم تروح له يسمع الشريط الأول قبل ما تطبعه

أمن الدولة يتابع الجنين فى بطن أمه
أمال الجنين ده بايع الريس ليه فى الانتخابات الماضية
اقولك الحكاية

الجنين ده ابوه بدقن فالظابط عرف ان ابوه قضى ليلة حلوه مع الجماعة (زوجته مش الاخوان ) فالجماعة يعنى بقت حامل وكده بقى يعنى
فأصر الباشا انه يستدعى الجنين ويفهمه ان سكة ابوه وحشة
وبالتهديد والوعيد وذهب المعز وسيفه وسجن مبارك وزيفه الجنين
اعلنها فى بطن امه انه يبايع السيد الرئيس ومن بعده جمال ومن بعدهما الجنين القادم بعد قليل ابنا لجمال

يا عم اسد
انا اول مرة يمكن ازورك لكن اوعدك انى ادخل اتابع
مش دقنى لانى ومن شهر يناير الماضى قررت انى احلق دقنى وراسى زلبطة
على الارضية يعنى

وليد — May 18, 2007 @ 12:39 am
| Edit This
11.

yourfrindalex كتب/ت

والله انتم ناس عسل ودمكم خفيف قوى رغم المحن ربنا معانا ومعاكم

yourfrindalex — May 18, 2007 @ 1:33 am
| Edit This
12.

نورا يونس كتب/ت

هي فعلا وصلت للعالمية

أصوات عالمية نشرتها هنا

http://www.globalvoicesonline.org/2007/05/17/egypt-its-all-in-the-beard/

ياللا يا عم دقنك بقت جلوبال

نورا يونس — May 18, 2007 @ 3:05 am
| Edit This
13.

محمد حرش كتب/ت

انا سعيد جدا يا عمر باابداعك الدائم حاول تخلص المدعوة الدراسة فى الجامعةوتؤدى ان كان لك الواجب الوطنى وحينها اتنبا لك يا عمر بمستقبل عظيم فى دنيا الابداع الادبى والسياسى ونصيحة اخيرة كن حريص على نفسك جدا وبا التوفيق اخوكممحمد حرش بلبيس

محمد حرش — May 18, 2007 @ 3:41 am
| Edit This
14.

sayedyounes كتب/ت

بصراحة الواحد حس أنه فى إسرائيل حتى اليهود نفسهم مبيعملوش كده حسبنا الله ونعم الوكيل

sayedyounes — May 18, 2007 @ 10:17 am
| Edit This
15.

nono كتب/ت

بجد بوست تحفة....هى دى الكوميديا السوداء كما يجب ان تكون....وبعدين ماله بقى المشى جنب الحيط..ده احلى ناس اللى ماشيين جنب الحيط وهو خارب البلد غيرهم...بتوع نعم نعم لسى السيد وهما مش لاقيين ياكلوا!يلا على العموم حمدلله على السلامة انك طلعت منها وده يخليك تقعد فى بيتكو تذاكر احسن مايعملولك بطاقة مراجعة للتقديرات

على فكرة “انا ولاحد”..........فاكرنى؟؟؟؟؟؟؟؟؟
ما افتكرش!!سلام

asad كتب/ت ..

يعني الواحد كل يوم بيقابل ناس كل “حد” فيهم مختلف عن التاني

لكن لما الواحد يقابل ” ولا حد ” أكيد لازم يفتكره يا نهى :)

أنا لازم أذاكر فعلاً وأبطل أرمي بلايا على الداخلية اليومين دول , اللي بييجي على الولايا ما يكسبش ههههههههههههه

nono — May 18, 2007 @ 11:31 pm
| Edit This
16.

Cluster One كتب/ت

hehehe….tab ana a3mel eih da2ny betetwal kol 3 ayam …el hormonate 3alyia la mo2a7’sa…ya tara el 7kouma momken tewafarli makanet we cream el 7ela2a 3ala beta2et el ta2min??

Cluster One — May 19, 2007 @ 12:13 am
| Edit This
17.

حسام كتب/ت

فطست من الضحك وان قاعد اقرا تدوينتك يا أبو الأسود.. مسخرة

حسام — May 19, 2007 @ 4:48 am
| Edit This
18.

محمود سعيد كتب/ت

يخرب بيتك يا جدع

ابقى ابعت لى نسخة علشان لما اربيها أبقى احطه فى المحفظة :-)

محمود سعيد — May 19, 2007 @ 5:39 pm
| Edit This
19.

ahmed كتب/ت

شكرا علي الموضوع الجميل يا اسد
والي الامام دائما
بس اهتم بمذاكرتك شويه لان الامتحانات خلاص ع الابواب

ahmed — May 21, 2007 @ 11:57 am
| Edit This
20.

ahmed كتب/ت

بكرر شكري واتمني انك متتأخرش علينا في التدوينه الجديده
http://www.for-sense.com/Call-for-free.html

ahmed — May 22, 2007 @ 4:36 pm
| Edit This
21.

nono كتب/ت

هو سوال مالوش دعوة بالموضوع بس اصلى لسه جديدة......معلهش
وقرات كده كام تدوينة وكنت عايزة اسال
اسد...هو انت اخوان؟؟؟
بس كده

asad كتب/ت ..

لا مش إخوان أنا إسلامجي مستقل عامل دماغ لوحدي يعني وعضو في عدد من التنظيمات السرية المسلحة :) !!

nono — May 22, 2007 @ 8:53 pm
| Edit This
22.

مصطفي كتب/ت

مصر ثقب الامل
د. مصطفي عبد العال

23/05/2007

كلما انتابني الشعور بأن ما يحدث في مصر الان يقابل بحالة من اللامبالاة والبلاهة التي تدفع بأي متابع لديه قليل من عقل ان يشعر بانعدام الامل لما يراه من احزاب تطق حنك وتقنع نفسها بأنها جزء من حركة ديمقراطيه سوف تقيم العدل بعد الف عام وما معني الالف في وطن له من العمر سبعة آلاف او سبعون الف سنة، وجماعة للاخوان المسلمين تسعي لاستعادة مصريتها بعد ان كانت تتباهي بأنها حركة من اجل كل العالم الاسلامي او حتي من اجل العالم كله مثلها مثل الاسلام الذي هو رسالة للعالمين، ومن ثم كنا نري كل متحدثيهم يعطشون حرف الجيم كلما تحدثوا خلافا لكل المصريين من اجل المحافظة علي الهوية ومع ذلك فقد قرروا بعد ان فكروا وتدبروا في اهمية استعادة البعد المصري ان يستخدموا روح الدعابة المصرية والتي لولاها لتحول المصريون الي حملة للسلاح في مواجهة هدر آدميتهم اليومي، وعليه فقد قرر الاخوان اطال الله بقاءهم ان يواجهوا قرار السلطة بمنع شعار الاسلام هو الحل بشعار (اللي بالي بالك) ولمن لا يتابعون الابداع المنهمر في مصر المحروسة فهذا الشعار هو اسم لاحد افلام الاستاذ اللمبي الذي هز عرش الاستاذ عادل امام بعد ان تفرغ الاخير للاشادة والتنظير لعظمة ما تقوم به السلطة في مصر من فرض للرخاء ودعم للحرية، كل هذا بينما يخرج احد الدكاتره الفقهاء من اولي العلم بتخريجة مفادها انه من الممكن ان ترضع الموظفة زميلها في العمل ليتسني لهما الاختلاط في الدواوين الحكومية دون ان يكون الشيطان ثالثهما، وقبل ان يحتج احد علي هذه التخريجات نشير الي تنويرية الدكتور الفقيه الذي لم يطالب بمنع المرأة من العمل كما يفعل اخوانه الفقهاء من غير الحاملين للدرجة العلمية ونتيجة لعلميته تلك فانه واجه المشكلة ووجد لها حلا بدلا من الهروب منها كما يفعل زملاؤه، مؤكدا في احد احاديثه الصحافية ان كلينتون لو كان رضع من مونيكا لما حدث بينهما ما حدث من خزي وعار للولايات المتحدة.
اعود واقول انه في ظل كل هذا البؤس والتردي والانحطاط نجد شابا في التاسعة عشرة من عمره يروي علي مدونته تجربته مع كمين الشرطة عندما استوقفوه لان لديه لحية واخذ يتنقل من باشا الي باشا حتي منّ الله عليه بالعودة الي السيارة التي تقل الركاب بين مدن مصر المحروسة، وحسب وصفه لما حدث عندما قال له احد الركاب (ده علشان دقنك ما تحلقها يا اخي، فنظرت اليه نظرة حرصت علي ان تجتمع فيها كل مظاهر الغضب والحماسة وتهور الشباب ونزقهم وقلت وشي وانا حر فيه هما هيشاركوني، فسكت الرجل الوقور الذي تآكل ذراعه الايمن لطول مشيه جنب الحائط).
ونتيجة لهذا النزق والتهور او في الحقيقة عمق الشعور بالادمية فقد قرر اسد ـ هذا هو الاسم الذي اختاره الشاب لنفسه ولمدونته ـ ان يصمم ما اسماه كارت متابعة لحية واذا ما ادهشكم التعبير كما حدث لي فسوف تتضح الفكرة عندما يعلمنا اسد ان هذا الكارت هو اقتباس من كارت متابعة المرأة الحامل والذي يدون فيه الطبيب تطور الحمل، وعليه فسوف تقوم ادارات امن الوطن والمواطن بعمل كروت لمتابعة حالة اللحي عند الناس اما لماذا يتفتق ذهن السلطة عن هكذا فكرة فغالبا ما يكون السبب هو تزايد اعداد المختصين في اروقة الحكم بامراض النساء والتناسل، الم يعلنوا لنا ان الجنين في بطن امه يؤيد الرئيس فكيف تأتي لهم ذلك دون ان يكون لديهم متخصصون في هذا المجال من الراسخين في العلم؟
يبقي ان نتساءل هل يشكل اسد ورفاقه ومن سار علي دربهم ثقبا للأمل في وطن تزداد فيه العتمة عبر تسلط سلطة تدمر الآدمية ونخب تطق حنك وبشر تتآكل سواعدهم من كثرة السير الي جوار الحائط، نتمني ان يكونوا بل ونصبو الي ان يستمروا في اطلاق لحاهم وتعميق سخريتهم بل والبصق علي هكذا واقع يجعلنا مضطرين بل ملزمين بأن نبرر للامن لماذا نطلق لحانا او نعاشر زوجاتنا او حتي نتنفس دون اذن منهم، ولا حول ولا قوة الا بالله.

مصطفي — May 23, 2007 @ 4:55 am
| Edit This
23.

asad كتب/ت

أهلا يا د. مصطفى و شكراً لاهتمامك بنقل المقال هنا , أتفهم وأبتهج فعلاً بالآمال التي يعلقها من سبقونا علينا لكنني لا أدري حقاً ما إذا كان جيلنا هو اللي هيلاقي التايهة ويجيب الديب من ديله ؟!

asad — May 23, 2007 @ 6:45 pm
| Edit This
24.

nono كتب/ت

كويس انك مش اخوان...طمنتى
تنظيمات سرية مسلحة ايه بس؟؟...يخرب عقلك هههههه....كده بعد الشر هتروح فى داهية..كارت متابعة ..ووتنظيمات سرية....انت فعلا عامل دماغ
بس اى دماغ ...ده انت بتهييس على الداخلية سخسيا
يخرب عقلك!!ههههه ..

nono — May 23, 2007 @ 9:52 pm
| Edit This
25.

bahry كتب/ت

الاخ أسد
الفكرة عبقرية فعلا وجديدة
بس ده مش جديد عليك
لم نفسك وذاكر شوية يا اسلامجي
وبعد الامتحانات لازم تروح تتابع مع الظابط بتاعك وعلشان انت طولت المرة ديه احتمال يعملك سونار
تحياتي
بحري من اسكندرية

bahry — May 24, 2007 @ 1:28 pm
| Edit This
26.

ابن الشعب كتب/ت

معايا كارت ميناتيل ينفع؟؟؟؟؟؟؟؟؟

ابن الشعب — August 29, 2007 @ 7:24 pm
27. | Edit This

Nour كتب/ت

أوقات كتير لازم الواحد يطنش

و يعيش كدا

” تنطش تعش تنتعش ”

بس كدا الواحد ممكن يصاب بمرض
الغباء المتفلطح

الغباء المتفلطح : داء مرض جديد اكتشفته هنا فمصر هو بيجي عدواه عن طريق الرجلين
حتى لو كنت لابس 5 شرابات و أستك برده هيجيلك لو دخلت أي مكان من الأماكن ديه
الجامعات .. المصلح الحكومية .. المدارس .. أفران العيش البلدي المدعم – ربنا يزيدها نعمه -

Nour — October 31, 2007 @ 9:50 am
|