زيادة الأسعار لرفع الأجور .. الأخ بيشتغل شيخ منصر ؟

asad — Mon, 2008/05/05 - 8:07pm

حبايبنا الحلوين..،

بعد العلاوة المباركة وتنفيض الشعب لإضراب 4 مايو

النهاردة خمسة مايو

والخبر من رويترز :

"اقترح الحزب الحاكم في مصر يوم الاثنين زيادات حادة في أسعار الوقود والسجائر ورسوم تراخيص السيارات لتغطية تكلفة زيادة اجور القطاع العام التي اقترحها الرئيس حسني مبارك الاسبوع الماضي"

حلاوتك يا أبو علاء !

والله عسل عسل عسل، مفيش بعد كدة، يخرب بيت الإبداع اللي يجبر وكالة محترمة زي رويترز تكتب كلام كدة

زيادة الأسعار لرفع الأجور ؟ زيادة الأسعار لرفع الأجور؟ هات يا رجب خمسة جنيه أعزمك ؟

حس الدعابة بجد مش معقول

قولها 3 مرات كدة :

زيادة الأسعار لرفع الأجور

بالشفا إن شاء الله

محطات البنزين بصدد وقف بيع البنزين والسولار لحين تطبيق الزيادات الجديدة، يعني وسائل المواصلات في طريقها للتوقف واللي عايز يروح يجيب جركن جاز للسواق ، أو يشتري حمار بلدي

البنزين 95 هيبقى بسعر 250 قرش

البنزين 92 بسعر 185 قرش

البنزين 90 بسعر 175 قرش.

السولار بتاع الميكروباصات بسعر 110 قرش بعد ما كان بـ 75

بالإضافة لزيادات في رسوم ترخيص السيارات وفرض إتاوة سنوية مقدارها 2% من قيمة السيارة للفئات الأعلى من 2000 cc ، و33% زيادة على أسعار السجائر المستوردة ، و10% للسجاير البلدي الخشب.

بس بصراحة الريس عداه العيب هو هيبجيب منين يعني احنا اللي طماعين ، وقال امبارح ان مفيش موارد "حقيقية" لتغطية العلاوة ؟ يبقى يعمل إيه ؟

يشوف موارد افتكاسات و اشتغالات

ونصب رسمي ع الشعب ابن اللي عمرها ما قالت لأ

حلاوتك يا راجل يا بركة

مبروك

bassem (not verified) — Mon, 2008/05/05 - 9:08pm

حلاوتك يا ابو الاسود
هو ده الابداع التمام
الف الف مبروك يا ريس
بقيت اخيرا دوت نت
من غير بلوج اسبوت ولا الكلام ده
مبرووووووووووك عقبالنا يارب
اخوك باسم

مبروك يامعلم -- لا وسيبك

mahmoud saber (not verified) — Mon, 2008/05/05 - 11:37pm

مبروك يامعلم
--
لا وسيبك انت
السجاير المحلية هتزيد 25 قرش
والمستورده هتزيد 2 جنيه
نياه نياه نياه
لا وكمان خلي الجامعات الخاصه عليها ضرايب
يعني مصاريفها هتزيد
بس مش واخد بالك انه مجابش سيرة الكورن فليكس !!

asad ma teshtery 3arabeya

sohier (not verified) — Mon, 2008/05/05 - 11:52pm

asad ma teshtery 3arabeya wa7yat abouk w takhoud feya sawab ana hageeb 3agla !:)

congratulation

ام نادين (not verified) — Tue, 2008/05/06 - 12:02am

مبروك يا عم الغضنفر عقبال اللى فى بالى واول حاجة كدة تكون اخبار تسد النفس انا عاوزاك تعمللى بانر على ذوقك علية علبة كيلوباترا صغير قصدى مارلبورو اخضر وتكتب علية الا السجاير عشان انت فاهم احسن خليها تولع طبيعى من غير اضرابات ولا حملات ووجع قلب انا اصلا مفروسة عشان مخدتش من التلاتين فى المية وكنت حاقدة على اللى خدوهم اصل اللى ييجى على ام نادين يا مرحبا يا مرحبا

مبروك

ايــــــــوب (not verified) — Tue, 2008/05/06 - 4:21am

مبروك يامعلم
انا عندى اقتراح صغنن علشان الموارد
ممكن تعمل رسم دخول لمدونتك
بمناسبة التجديدات
وكله علشان مصر

الف مبروك يا استاذ

Jahiza (not verified) — Fri, 2008/05/09 - 2:45am

الف مبروك يا استاذ عمر
وعقبال ماتنقل كل خلجاتك من المطرح القديم
على خير

وبالنوسبة لما تفضل به الحاج ابو علاء ما هوة الى تخاريف شيخوخة
الراجل مش مصدق انه شبك فالتمانين
عمال يهرتل
وماتقلقش يا سيدي من زيادة الاسعار
انشاءالله قريبا يمسك الحاج اخو علاء
ويظبطنا

زياده ايه .....لإيه ؟؟؟

أروي الطويل (not verified) — Mon, 2008/05/19 - 5:51pm

زيادة الأسعار لرفع الأجور

حكموكى ما حكموكى

ساره فى زمن الحزن (not verified) — Wed, 2008/05/21 - 8:27am

حكموكى ما حكموكى
لا الحاكم وطنى و لا خلكوكى
بالأسعار خربوكى بالإرهاب سجنوكى
لا تقولى يامحروسه إنك حره
حكامك فى كل عصر باعوكى
كله بيهتف شبيكى لبيكى
و أول ما يحكم يكلبش على طول إيداكى
حكموكى و الشعب غايب
أعدائنا بقوا كلهم حبايب
فى وحل السلام نيموكى
حكموكى ما حكموكى

مصر في مهب الريح

دنيا (not verified) — Wed, 2008/09/03 - 10:04pm

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

أحداث قادمة

صحافة كتبتُها

من أوضتي الزرقا

الأكثر قراءة

Today's:

All time:

آخر التعليقات

Navigation

User login