مش مساء الخير

حلوه حكايات ورق العملة دي..

فكرتني بحكيوه .. زمان كنت شغال رصد للإفيهات اللى على أبواب حمامات الكلية.. وكنت بالاقيها تنكتب هنا.. فيقوم العمال بازالتها.. يقوم صاحبها يكتبها تاني.. او فى حمام تاني.. ناس عندها اصرار على التعبير عن اللى بيفكروا فيه بالطريقة دي.. كلام بطبيعته سخن وصعب يتقال علني يعني.. من أول شتيمة الريس.. لحد مش عارف مين مالها..
المهم عجبتني فكرة نقل رسالة لمجهولين دي.. فكرتني برسالة الغريق اللى حاططها فى قزازه.. او السجين اللى كان بيرمي ورق كاتب عليه يومياته من شباك السجن.. أو رسالة بعتتها حكومة ريجان بكل لغات العالم للفضاء الخارجي عسى أن تجد سكان فى الفضاء

المهم قلت أجرب أعمل حاجه وأشوف هاتتداول إزاي
فكتبت " نرويكى من دمنا تسقينا من سمك " كانت أول قصيدة كتبتها فى حياتي بعد تجربة حب وهجر اسرع من الضوء فى ثانوي
وسيبتها

واحد قابلني بعدها بفترة وقاللي قصيدة طويله مطلعها العبارة دي نفسها .. بس فى شكل قصيدة وطنية من اللى قلبك يحبها.. اتحايلت عليه يقولى مصدرها
قاللى مكتوبه على باب حمام فى تجاره.. أنا كنت فى اقتصاد.. قلتله فين.. فوصفلى المكان.. رحت.. طبعا الفارق بين حمامات اقتصاد وحمامات تجاره السبب فيه مكتب التنسيق.. فمافيش داعي اقلب المواجع.. المهم لقيت يجي اتناشر بيت مكتوبين
هاريين مصر الغلبانة تلطيش.. نقلتهم على ورقه ومشيت.. بعديها بتلت تيام عديت على نفس المكان فى تجاره مع صديق.. لقيت الحمام مهدود وبيوضبوه
ومن ساعتها وأنا مؤمن بالثورات الصامتة

فيه على فكره كتاب لذيذ عن الموضوع ده تقريبا اسمه لو انا لسه فاكر.. هتاف الصامتين

أنا صرفت بتاع عشرة مليون جنيه من اللي مكتوب عليه أحمد وسوسو للأبد..للأبد